Gott at vita um gjaldskort

Her eru nøkur góð ráð, sum eru galdandi fyri øll gjaldskort.

• Gjaldskort eru at meta sum kontantur peningur. Fyrsta góða ráðið er tí altíð at goyma kortið á tryggum staði. Bæði úti og heima. Kortið má ikki liggja frammi.
• Tað ber til at fáa sama loynital til øll tíni gjaldskort í Betri Banka, og tað kostar ikki eyka. Tá er lættari at minnast loynitalið.
• Lær teg loynitalið uttanat. Hevur tú tørv á at skriva loynitalið niður, kanst tú fáa ein loynitalsáminnara frá okkum. 
• Loynitalið er persónligt. Lat ongan annan kenna tað. Halt hondina yvir, tá tú trýstir loynitalið inn í sjálvtøkum. Tað hendir, at sníkar seta evarska lítil myndatól inn í erva á sjálvtøkuni og soleiðis fáa atgongd til títt loynital.
• Nýt ongantíð loynitalið sum loynital ella atgongdarkotu til aðrar skipanir. 
• Í útheiminum mást tú bert brúka loynitalið í peningasjálvtøkum, gjaldsjálvtøkum og handlum, har lýst verður við kortmerkinum
• Skriva ikki undir nakra kvittan, fyrr enn tann samlaða upphæddin er skrivað
• Minst til tína kvittan, og goym hana at hava til eftirlit seinni
• Er kortið burturmist, ella hevur tú illgruna um, at kortið verður misbrúkt, skal tað fráboðast Betri Banka ella Nets beinanvegin, so kortið verður sperrað.

Keyp trygt á netinum

Alsamt fleiri keypa á netinum. Ert tú ein av teimum, eigur tú at tryggja tær, at titt gjaldskort er tilmeldað 3D Secure trygdarskipanina. 

Tá tú keypir við gjaldskorti á netinum, kanst tú verða biðin um at tøppa inn eitt 3D Secure loynital. 3D Secure er samlaða heitið fyri Dankort Secured by Nets, Verified by Visa og Mastercard ID Check. Hetta er ein eyka trygd, tá tú keypir á netinum. Tá tú keypir á netinum, skalt tú umframt tínar kortupplýsingar eisini brúka eina einnýtiskotu, sum tú fært sum sms boð. 

Frá 1.oktober 2018 eru nýggj gjaldskort sjálvvirkandi tilmeldað 3D Secure. Sjálvvirkandi tilmeldingarskipanin velur fartelefonnummarið, tú seinast hevur upplýst Betri Banka. 

Um tú ikki hevur tilmeldað títt núverandi kort til 3D Secure trygdarskipanina, ert tú vækomin at seta teg í samband við okkum á tlf. 348 000, so kunnu vit gera tað fyri teg.